UMFÍ og ÍSÍ bjóða í kaffi á Degi sjálfboðaliðans
Í tilefni af Degi sjálfboðaliðans fimmtudaginn 5. desember bjóða UMFÍ og ÍSÍ sjálfboðaliðum íþróttahreyfingarinnar að koma í Íþróttamiðstöðina í Laugardal og halda upp á daginn. Öllum er boðið, fyrrverandi stjórnarfólki UMFÍ, sjálfboðaliðum og fleirum til sem langar að lyfta sér upp eftir gott starf sem sjálfboðaliði íþróttahreyfingarinnar.
Klukkan 15:00 verður stutt málþing þar sem Íþróttaeldhugi ársins 2023, Guðrún Kristín Einarsdóttir ætlar þar að segja sögu sína af sjálfboðastarfi fyrir íþróttahreyfinguna. Jónas Hlíðar Vilhelmsson, formaður Fálka, sem er feðraklúbbur í Val, segir frá starfi þeirra. Að lokum ætlar Petra Ruth Rúnarsdóttir, formaður ungmennafélagsins Þróttar Vogum, að segja frá því hvað þátttaka í sjálfboðastarfi hefur gefið henni.
Að dagskrá lokinni eða um klukkan 16:00 er öllum viðstöddum boðið í vöfflukaffi í boði Vilko og Mjólkursamsölunnar í þjónustumiðstöð UMFÍ, sem er á þriðju hæð Íþróttamiðstöðvarinnar.
Boðið verður líka upp á kaffi í þjónustumiðstöð UMFÍ á Sauðárkróki.
Með þessu vilja ÍSÍ og UMFÍ vekja athygli á ómetanlegu framlagi sjálfboðaliða til íþróttastarfsins, en án þeirra gengi starfið einfaldlega ekki upp.
UMFÍ hvetur íþróttahreyfinguna um allt land til að nýta daginn og lyfta starfi sjálfboðaliða upp með einum eða öðrum hætti.
Takk sjálfboðaliðar!
