18. - 20. september 2026

Á laugardeginum fluttu þeir Skúli Bragi Geirdal, sviðsstjóri hjá Netvís, og Ólafur Stefánsson, fyrrum fyrirliði íslenska landsliðsins í handbolta, hvor sitt erindið áður en þeir stýrðu vinnusmiðjum með þátttakendum. Skúli fjallaði um hvernig öpp og algóritmar eru hönnuð til að halda notendum við skjáinn — og hvernig við tökum aftur stjórnina. Ólafur fjallaði um sálfræðilegan sveigjanleika og hvernig sá hæfileiki hjálpar okkur að halda tryggð við eigin gildi og markmið.

Erindin voru kveikjan að þremur vinnusmiðjum — Styrkjumst, Blómstrum og Tengjumst — um líkamlega, andlega og félagslega heilsu í tengslum við skjánotkun. Ungmennaráðið stýrði sjálft Tengjumst, sem fjallaði um hvernig skjánotkun hefur áhrif á samskipti og tengsl við annað fólk.

Helgin bauð líka upp á fjölbreytt hópefli, sundlaugarpartý, kvöldvökur og heimahópastarf, þar sem þátttakendur unnu saman þvert á aldur og landshluta.

Á sunnudeginum tóku þátttakendur þátt í kaffihúsaspjalli við þingmenn og annað áhrifafólk. Á meðal gesta voru: 

• Bergþór Ólason, þingmaður Miðflokksins.
• Guðmundur Ari Sigurjónsson, þingmaður Samfylkingarinnar.
• Halla Hrund Logadóttir, þingmaður Framsóknarflokksins.
• Bryndís Haraldsdóttir, þingmaður Sjálfstæðisflokksins.
• María Rut Kristinsdóttir, þingmaður Viðreisnar.
• Ingvar Þóroddsson, þingmaður Viðreisnar.
• Silja Sóley Birgisdóttir, borgarfulltrúi Sósíalistaflokksins í Reykjavík.
• Einar Jóhannes Guðnason, fulltrúi Miðflokksins í Kópavogi.
• Salma Björt Önnudóttir, fulltrúi Ungliðahreyfingar Miðflokksins.
• Embla Líf Hallsdóttir, formaður Ungra athafnakvenna.
• Þórhildur Vala Kjartansdóttir, varðstjóri hjá lögreglunni.
• Jóhann Steinar Ingimundarson, formaður UMFÍ.
• Kolbrún Ósk Pétursdóttir, verkefnastýra Æskulýðsvettvangsins
• Patrekur Jóhannesson, fyrrum afreksmaður í handbolta, þjálfari og starfsmaður Afrekssmiðstöðvar ÍSÍ.
• Silja Úlfarsdóttir, íþróttapönkari, þjálfari og umboðsmaður íþróttafólksþ

Gestirnir settust við borð og þátttakendur völdu sér sæti eftir því við hvern þeir vildu spjalla — á um 10 mínútna fresti var gefið merki og fólk færði sig og spjallaði við nýjan viðmælanda. Þátttakendur voru ánægðir með spjallið: „Gekk mjög vel og umræður voru fjölbreyttar. Ráðafólk stóð sig vel,“ sagði einn, og annar bætti við: „Frábær hugmynd og tækifæri sem að gefst alls ekki oft að fá að tala við þingmenn og fleira fólk.“

Í könnun sem lögð var fyrir eftir helgina kom fram mikil ánægja með dagskrána og skipulagið: „Hún var góð hvatning til að fara úr símanum og kynnast fólki, ásamt því að þetta var mjög vel skipulagt,“ sagði einn þátttakandi, og annar: „Fyrirlesararnir og vinnustofurnar voru mjög góðar.“ Heimahóparnir fengu líka falleg orð: „Virkilega skemmtilegt að hafa svona heimahópa því að maður kynnist þeim svo vel og það kemur svo skemmtileg stemmning, keppnisskap og liðsheild í hópinn.“

Þátttakendur komu úr öllum landshlutum. Rúta fór frá Reykjavík með viðkomu í Borgarnesi, önnur frá Akureyri með viðkomu á Sauðárkróki, og bílaleigubílar fluttu þátttakendur frá Egilsstöðum og Höfn — en nokkur hópur kom á eigin vegum.