103. ársþing UMSE í Funaborg

103. ársþing Ungmennasambands Eyjafjarðar (UMSE) var haldið fimmtudaginn 4. apríl síðastliðinn í Funaborg í Eyjafjarðarsveit. Mæting var góð og forseti þingsins var Sigurgeir Hreinsson.

Litlar breytingar voru gerðar á stjórn UMSE. Kristlaug Valdimarsdóttir fyrrum ritari gaf þó ekki kost á sér áfram í starfið og í hennar stað var kjörinn Gunnbjörn Rúnar Ketilsson. Annað hélst óbreytt.

Átta tillögur voru lagðar fyrir þingið. Meðal annars var tillaga um að UMSE greiði helming þátttökugjalda keppenda UMSE á Unglingalandsmóti UMFÍ 1. – 4. ágúst næstkomandi. Ásamt því var fólk hvatt til þess að fjölmenna á Unglingalandsmót UMFÍ og Landsmót 50+ sem fer fram 7. – 9. júní næstkomandi. Einnig var gerð tillaga um breytingu á skiptingu lottófjármuna UMSE og breytingu á kjöri á íþróttamanni ársins. Allar tillögur þingsins voru samþykktar.  

Haukur Valtýsson var gestur þingsins fyrir hönd UMFÍ. Haukur hélt ávarp þar sem hann skilaði góðum kveðjum fyrir hönd stjórnar og starfsfólks UMFÍ. Í ávarpi sínu talaði Haukur meðal annars um stofnun svæðastöðva UMFÍ og ÍSÍ og á hvaða hátt þær koma til með að efla íþróttahéruð landsins og samræma starfsemi þeirra á landsvísu. Ásamt því hvernig svæðastöðvarnar falla vel að áherslum og stefnu mennta- og barnamálaráðuneytis í íþróttamálum sem styður við verkefnið. Í lokinn minnti Haukur á sjóði UMFÍ og íþróttasjóð ríkisins sem og hann hvatti til þátttöku á viðburðum UMFÍ komandi sumar.

Ásamt Hauki mætti Viðar Sigurjónsson, sérfræðingur á stjórnsýslusviði ÍSÍ sem fulltrúi ÍSÍ á þingið.

Ársskýrslu ungmennasambandsins má finna á heimasíðu UMSE.

Stjórn UMSE

Sigurður Eiríksson, formaður
Þorgerður Guðmundsdóttir, varaformaður
Einar Hafliðason, gjaldkeri
Gunnbjörn Rúnar Ketilsson, ritari
Kristín Thorberg, meðstjórnandi