Taka þátt í 5-6 greinum á Unglingalandsmóti

Mikil stemning er fyrir Unglingalandsmóti UMFÍ sem fer fram á Sauðárkróki um verslunarmannahelgina. Rúmlega 1.000 þátttakendur á aldrinum 11–18 ára voru skráðir til leiks þegar lokað var fyrir skráningu í greinar á miðnætti á sunnudagskvöld. Þátttakendur eru skráðir í 6.270 greinar, sem merkir að hver og einn þátttakandi tekur þátt í 5 til 6 greinum mótsins.

Á meðal einstakra greina sem góð skráning er í má nefna skák en þátttakendur í greininni hafa ekki verið jafn margir í 20 ár. Sömuleiðis er metskráning í hestaíþróttum og hefur þurft að færa upphaf greinarinnar laugardaginn 1. ágúst frá klukkan 11 til klukkan 10.

Þátttakendur og forráðafólk getur fundið upplýsingar um hverja keppnisgrein Unglingalandsmótsins á vefsvæði mótsins, staðsetningar greina og fleira sem þarf til að njóta mótsins. Nákvæm dagskrá hverrar greinar verður birt í vikunni.

Á mótinu er leikið eftir svokölluðu Monrad-kerfi, sem gengur út á sjálfvirka geturöðun. Það felur í sér að í fyrstu umferð er liðum raðað saman handahófskennt og spilar hvert þeirra tiltekinn fjölda leikja á hverju móti.

Smelltu hér: Keppnisgreinar

Tjaldsvæði

Við minnum jafnframt á að nú þegar styttist í mótið þarf að kaupa aðgang að tjaldsvæði þess. Tjaldsvæðið er á Nöfunum ofan við íþróttasvæðið á Sauðárkróki.

Fólk sem hefur keypt aðgang að tjaldsvæði getur nálgast miða á svæðið í þjónustumiðstöð mótsins. Með hverju tjaldsvæði fylgir aðgangur að rafmagni.