Unglingalandsmót

Árið 1991 kom upp sú hugmynd hjá Ungmennasambandi Eyjafjarðar að halda landsmót fyrir unglinga innan ungmennafélagshreyfingarinnar. Þessi hugmynd hafði reyndar komið upp áður en ekki orðið af fram-kvæmdum. Aðdragandinn var sá að UMSE tók að sér að halda Íslandsmeistaramót 14 ára og yngri í frjálsíþróttum á Akureyri sumarið 1991.

Þegar það var í undirbúningi kviknaði sú hugmynd að gaman væri að halda stórt mót með þátttöku krakka úr fleiri en einni íþróttagrein. Stjórn UMSE ákvað að kanna áhuga fyrir slíku móti sem jafnframt gæti verið afmælismót sambandsins sem yrði 70 ára 1992. Strax þótti fýsilegur kostur að bjóða félögum og samböndum UMFÍ að vera með og upp úr því var farið að tala um unglinga-landsmót UMFÍ sem haldið yrði með nokkurra ára fresti í framtíðinni.

Upphafsmaður þessarar hugmyndar er Jón Sævar Þórðarson sem þá hafði verið framkvæmdastjóri UMSE um tíma. Jón er þekktur fyrir atorku og þarna fékk hann verkefni við hæfi. Hann má því vel kallast frumkvöðull unglingalandsmótanna. Strax í upphafi kom fram sú hugsun að mótið ætti ekki fyrst og fremst að miðast við toppárangur í einstökum greinum því einnig yrði góður skammtur af skemmtun í boði fyrir ungdóminn. Blandað yrði saman keppni og kvöldvökum, skemmtun og útivist og þarna yrði eitthvað fyrir alla.

                                                                                                                            Vormenn Íslands, bls. 587.