Unglingalandsmót

Unglingalandsmót UMFÍ snýst ekki bara um keppni heldur líka um upplifunina, stemninguna og samveruna sem myndast alla helgina. Frá morgni til kvölds er svæðið fullt af lífi þar sem allir geta fundið eitthvað við sitt hæfi og tekið þátt á sínum eigin forsendum.

Öll ungmenni á aldrinum 11–18 ára geta tekið þátt – hvort sem þau æfa íþróttir reglulega eða ekki. Það þarf hvorki að vera skráð í íþróttafélag né mæta með eigið lið. Þátttakendur sem koma einir eða án liðs eru einfaldlega paraðir saman við aðra og fá tækifæri til að taka þátt í greinum eins og körfubolta og fótbolta í skemmtilegu og jákvæðu umhverfi.

Samhliða keppninni er boðið upp á fjölbreytta afþreyingu fyrir alla fjölskylduna. Foreldrar, systkini og aðrir gestir geta tekið þátt í leikjum, skemmtun og fjölmörgum viðburðum sem skapa einstaka hátíðarstemningu alla mótsdagana.

Þátttökugjald er 11.900 kr. og innifelur þátttöku í öllum keppnisgreinum mótsins, aðgang að viðburðum og frítt í sund í öllum sundlaugum Skagafjarðar alla mótshelgina. Yngri systkini greiða ekkert þátttökugjald en geta engu að síður tekið þátt í fjölbreyttri afþreyingu og skemmtilegum viðburðum sem í boði eru frá morgni til kvölds.

Skráning opnar 15. júní.

Þátttakendur keppa fyrir hönd íþróttahéraða landsins og því er mikilvægt að velja rétt hérað við skráningu. Fjölmörg íþróttahéruð styrkja þátttakendur af sínu svæði að hluta eða öllu leyti og sum bjóða einnig upp á sérstakan varning, til dæmis boli eða peysur fyrir sitt fólk. Ef þú ert ekki viss um hvaða íþróttahéraði þú tilheyrir er hægt að nálgast nánari upplýsingar hér. 

Við skráningu er netfang þátttakenda nýtt til að senda út mikilvægar upplýsingar um mótið og dagskrá þess. Með skráningu samþykkja þátttakendur einnig að myndir og myndbönd sem tekin eru á mótinu megi nýta í kynningar- og útgáfuefni UMFÍ. Jafnframt er veitt heimild til að birta nöfn þátttakenda á heimasíðu UMFÍ í tengslum við ráslista, úrslit og aðrar upplýsingar sem tengjast framkvæmd mótsins.

Á mótinu geta þátttakendur í liðagreinum sett saman sín eigin lið og skapað alveg einstaka stemningu. Það skiptir engu máli hvort liðsfélagar séu úr sama íþróttahéraði, sama félagi eða jafnvel ekki í félagi yfir höfuð – allir geta spilað saman.

Hver þátttakandi skráir sig sjálfur í mótið, en sá sem er fyrstur getur stofnað lið og valið nafn á það í skráningarkerfinu. Þegar liðið hefur verið stofnað geta aðrir þátttakendur einfaldlega valið sama liðsheiti við sína skráningu.

Þau sem eru ekki með lið fyrirfram þurfa ekki að hafa áhyggjur. Þátttakendur sem skrá sig „án liðs“ verða paraðir saman með öðrum og fá þannig tækifæri til að kynnast nýju fólki og taka þátt í skemmtilegri liðsheild.

Skapandi liðsnöfn eru líka stór hluti af stemningunni á mótinu. Í gegnum árin hafa lið mætt til leiks með nöfn á borð við Bónusgrísirnir, Bakkabræður og Rothöggið – og oft fylgja litríkir búningar með. Það er auðvitað engin skylda að mæta í sérstökum búningum, en það setur skemmtilegan svip á mótið og gerir upplifunina enn eftirminnilegri fyrir liðin sjálf.

Mótið 2026 fer fram á Sauðárkróki og hentar bærinn einstaklega vel fyrir svona stóra fjölskyldu- og íþróttahátíð. Keppnissvæðin eru flest staðsett í hjarta bæjarins og tjaldsvæðið á Nöfunum er rétt ofan við íþróttasvæðið. Það gerir upplifunina þægilega fyrir fjölskyldur og þátttakendur – þegar komið er á Krókinn er einfaldlega hægt að leggja bílnum og ganga á milli viðburða, keppnissvæða og afþreyingar alla helgina.

Á Sauðárkróki búa um 2.800 manns og bærinn er þekktur fyrir öflugt samfélag og mikla íþróttamenningu. Þar er fyrsta flokks aðstaða til íþróttaiðkunar, meðal annars íþróttahús, frjálsíþróttavöllur, gras- og gervigrasvellir, hestaíþróttasvæði, golfvöllur, motocrossbraut og glæsileg 25 metra sundlaug með nýjum rennibrautum sem á eftir að verða vinsæll samkomustaður yfir mótshelgina.

Mikill fjöldi íþrótta- og skemmtigreina verður í boði á mótinu þar sem allir geta fundið eitthvað við sitt hæfi. Þar blandast saman hefðbundnar keppnisgreinar, skemmtilegar áskoranir og fjölskylduvænir viðburðir sem skapa líf og stemningu um alla mótshelgina.

Í sumum greinum er keppt til verðlauna en aðrar eru opnar öllum sem vilja prófa sig áfram, taka þátt og hafa gaman.

Unnið er að endanlegri dagskrá mótsins en meðal væntanlegra greina eru badminton, bogfimi, frisbígolf, frjálsar íþróttir, glíma, golf, grasblak, grashandbolti, hestaíþróttir, hjólreiðar, júdo, knattspyrna, kökuskreytingar, körfubolti, krakkahreysti, motocross, píla, skák, stafsetning, sund og upplestur.

Keppnisfyrirkomulag í flestum greinum verður með hefðbundnu sniði en á síðustu árum hafa verið gerðar breytingar á nokkrum af stærstu greinunum sem hafa mælst afar vel fyrir.

Körfubolti fer til dæmis fram á einum degi og sama fyrirkomulag verður í knattspyrnu og fleiri greinum. Með þessu verður auðveldara fyrir þátttakendur og fjölskyldur að skipuleggja helgina, taka þátt í fleiri greinum og njóta alls þess sem mótið hefur upp á að bjóða.

Þannig skapast minni árekstrar á milli greina, minna stress og enn meiri stemning á mótssvæðinu alla helgina.

Fjölbreytt afþreyingadagskrá verður í boði alla mótshelgina þar sem allir mótsgestir geta fundið eitthvað skemmtilegt við sitt hæfi.

Yfir daginn verða fjölmargir viðburðir og verkefni fyrir bæði unga sem aldna. Þar má meðal annars nefna ævintýragarð með skátunum, fjölskylduhlaup á sandströndinni, blindrabolta, LED badminton, pokavarp, jóga, pútt, barnadagskrá, sundleika, bæjargöngu með leiðsögn, hæfileikasvið, danskeppni, listasmiðju, sundlaugarpartí og sandkastalagerð.

Foreldrar, systkini og aðrir gestir sem ekki taka þátt í keppnisgreinum geta því tekið fullan þátt í stemningunni og notið fjölbreyttrar dagskrár frá morgni til kvölds.

Á kvöldin tekur svo við tónlistardagskrá og skemmtun sem er opin öllum mótsgestum.

Tjaldsvæði mótsins verður á Nöfunum, rétt fyrir ofan íþróttasvæðið í hjarta Sauðárkróks. Þar verður gott pláss fyrir fjölskyldur og gesti sem vilja njóta þess að vera í miðju stemningarinnar alla helgina.

Gjald fyrir hverja tjaldsvæðiseiningu er 9.900 kr. og gildir það fyrir alla helgina, frá fimmtudegi til mánudags. Innifalið í gjaldinu er aðgangur að rafmagni, snyrtingum og rennandi vatni.

Þeir sem hyggjast dvelja á tjaldsvæðinu þurfa að skrá sig og ganga frá greiðslu áður en komið er á mótsstað. Skráning fer fram á UMFÍ og opnar 15. júní 2026.

Tjaldsvæðinu verður ekki skipt upp eftir íþróttahéruðum og því verður líf og fjör um allt svæðið. Á meðan mótinu stendur verður sólarhringsgæsla björgunarsveitarfólks á svæðinu til að tryggja öryggi og góða umgjörð fyrir alla gesti.

Þjónustumiðstöð mótsins verður opin alla mótsdagana þar sem hægt verður að nálgast upplýsingar um dagskrá, keppnisgreinar, mótssvæðið og allt sem tengist mótahaldinu.

Þar fá þátttakendur einnig afhent armbönd sem eru nauðsynleg til að taka þátt í keppni og viðburðum mótsins.

Þjónustumiðstöðin verður staðsett í Árskóla við Skagfirðingabraut.

Ómar Bragi Stefánsson, framkvæmdastjóri mótins. Netfang: omar@umfi.is. Sími: 898 1095.